Kung ₱500 ang minimum wage sa Rehiyon 10 ug ₱695 sa Metro Manila, nagpakita kini og dako nga kalainan sa sweldo sa matag rehiyon sa Pilipinas, kini ang giingon ni Mimi Doringo sa grupong Kalipunan ng Damayang Mahihirap o KADAMAY.
Sumala ni Doringo, ang maong sistema sa regional wage dili na makatubag sa tinuod nga panginahanglan sa mga mamumuo karong panahona tungod sa parehas ra nga taas nga presyo sa mga palaliton sa tibuok nasod.
Dugang pa niya, mas lisod pa ang kahimtang sa mga mamumuo sa agrikultura nga usahay mokita lang og ₱150 hangtod ₱200 matag adlaw.
Gipunting usab niya nga ang pagsaka sa presyo sa lana ug uban pang bayaron nakaapekto sa kinabuhi sa mga trabahante ug sa ilang pamilya.
Busa, nanawagan ang KADAMAY nga ipatuman ang national minimum wage aron masiguro ang patas ug makabuhi nga sweldo sa tanang mamumuo sa Pilipinas.
