Paggahin og saktong pundo alang sa mga serbisyo ug dili sa maleta ang singgit sa mga kabos taliwala sa gihimong budget deliberation sa nasod.
Gipahayag ni Kalipunan ng Damayang Mahirap o KADAMAY Secretary General Mimi Doringo nga kinahanglang tan-awon og maayo sa Kongreso ang ilang mga desisyon aron masiguro nga moadto sa tambal, edukasyon, ug balay ang pundo ug dili sa kamot sa mga kawatang opisyal.
Gipasabot usab ni Doringo nga dili na igo ang paghatag og ayuda karong panahona tungod kay pantapal ra kini nga solusyon ug mas kinahanglan ang programa nga magpadayon alang sa katawhan.
Tungod niini, nanawagan ang grupo sa gobyerno nga ipauna ang kaayohan sa mga trabahante, mangingisda, ug mag-uuma labi na taliwala sa mga kalisod nga giatubang sa nasod.-
