CAGAYAN DE ORO CITY – Lauman nga kuwestiyonon sa kampo ni incumbent Misamis Oriental Gov. Peter Unabia ang kadaugan ni former Congresswoman Juliette Uy sa en banc sa Commission on Elections o Comelec.
Kini human kompirmaha ni Comelec-Misamis Oriental Provincial Election Supervisor Atty Carlito Ravelo nga nag-abiso ang kampo ni Unabia nga mohimo sila’g aksyong-legal batok sa pagdaug ni Uy aron ilhon nga bag-ong gobernador sa lalawigan.
Miingon si Ravelo nga wala na’y kontrol ang provincial board of canvassers kay wala kini sa gahom apan sa mas taas pa nila nga buhatan.
Mahimo usab nga modangop sa korte ang kampo sa gobernador kabahin sa ilang pagkuwestiyon sa kadaugan ni Uy.
Una niini,gitahod ni Uy ang tinguha sa kampo ni Unabia nga moduso’g aksyong-legal apan tugbangan usab nila kini sa pagdason sa kaugalingong pagpanumbong kabahin sa panagtigi nila sa May 12 elections.
Hisayrang gipukan ni Uy si Unabia sa pinal nga resultado nga anaa sa 327-mil 305 botos batok sa 235-mil 023.
