GIPAHINUMDOMAN ni City Councilor Yve Emano ang mga kapwa niya opisyal sa lokal nga panggamhanan nga magmatngon ug mahimong responsable sa ilang mga pahayag isip mga public figure, ilabi na kon kini ginabutyag sa publiko ug sa social media.
Kini kasunod sa nahimong viral nga pahayag ni Councilor Enrico Salcedo nga mitumong sa iyang mga trolls sa social media, nga nagdala og nagkalainlaing reaksyon gikan sa netizens.
Sumala ni Emano, kinahanglan likayan sa mga opisyal ang paggamit sa mga sensitibo nga panultihon sama sa “pag-ambak sa tulay sa Carmen,” tungod kay ang maong isyu sensitibo ug seryoso nga butang alang sa dakbayan.
Matod niya, ang siyudad naningkamot nga malikayan ang maong mga insidente human sa sunod-sunod nga mga kaso sa pag-ambak sa mga tulay sa syudad.
Gipasabot ni Emano nga bisan og dili na gyud malikayan ang bashing o negatibong komento sa social media, adunay responsibilidad ang usa ka opisyal sa pagpili sa hustong mga pulong nga gamiton sa publiko.
Butyag ni Emano nga dili man makontrolar sa usa ka lider ang tanang reaksyon sa katawhan online, apan makontrolar niini ang iyang kaugalingong isulti ug buhaton, ilabi na kon kini may kalabutan sa sensitibong mga isyu nga nakaapekto sa komunidad.
Nagpasiugda si Emano nga isip mga lider sa siyudad, importante nga magpakita og maayong ehemplo sa pamulong ug pamatasan aron malikayan ang sayop nga pagsabot ug dili na mosamot ang kalibog sa publiko. (James oliver)
