CAGAYAN DE ORO CITY – Bag-o na ang nagsilbing lider sa panig sa minoriya sa konseho dihang nahukman nga hulipan si Kag. James Judith.
Kini human mihimo’g privilege motion ni Konsehal Jose Pepe Abbu Jr aron ipuli si Kag Ian Achas nga magsilbi nila nga bag-ong lider sa oposisyon sulod sa konseho sa dakbayan.
Miingon si Abbu nga dugay nang dismayado ang minoriya sa dinal-an ni Judith nga daw didto pa mopabor sa kagustuhan sa mayoriya kabahin sa mga dagkong isyu nga giatubang sa dakbayan.
Tipik usab sa gitudlo ni Abbu nga rason sa ilang hukom pagsipa kang Judith ang nabulgar nga bikil nila ni City Vice Mayor Jocelyn ‘Bebot’ Rodriguez sa miaging semana.
Samtang wala na babagi apan gipaluyuhan sa mayoriya ang hukom sa minoriya nga magbag-o sa ilang lider alang sa mas sihag nga panaghisgot sa mga isyu ug mga balaodnon sulod sa konseho sa dakbayan.
Kini human gilayong giuyunan nila ni City Vice Mayor Jocelyn ‘Bebot’ Rodriguez ug Majority Leader Edgar Cabanlas ang katudluan ni Achas nga bag-ong minority leader sa konseho.
Wala na giagi sa botasyon apan igo na ang gisulti sa minoriya nga nawad-an na sila’g pagsalig ug kumpiyansa kang Judith rason nga ilang gitudlo si Achas mangulo sa oposisyon.
Sa pikas bahin,mas makalihok ug makahimo’g daghang sugyot-ordinansa kon sila Judith ug Malvern Esparcia mag-ilis na sa kabayo ug mismong motimon niini sulod sa konseho.
Kini ang sambingay nga gipalanog ni Judith pipila ka oras gikan sa iyang pagka-hulipi nga mangulo sa minoriya atol sa ilang sesyon kagahapon sa hapon.
Giangkon ni Judith nga dunay higayon nga naipit ang iyang mga sugyot-ordinansa tungod usab sa pagsilbi niya nga kanhi sakop sa oposisyon.
Naglikay na usab kini’g komento sa mga pasangil sa bise-mayor nga sila dagway’g salapi ug walay baruganan samtang naghulat nga dawaton o dili nga mahimong sakop sa mayoriya sa konseho.
