Gikwestyon karon ni Atty. Samson So Tan, MDM kon tinuod ba gyud nga independente ang Pilipinas o nagpabilin ba gihapon kitang nalambigit sa impluwensya sa mga kanhing kolonayser.
Bisan pa sa gisaulog nato nga kagawasan, namatikdan ni Atty. Tan nga daghang Pilipino ang nagtinguha gihapon nga mangabroad tungod sa paglaom nga mas maayo ang kahimtang sa ubang nasod.
Dugang pa sa maong abogado, dili usab garantisado nga hayahay ang atong panginabuhi kon nasakop pa kita sa Amerika karon tungod kay nagdepende man gihapon kini sa kinaiya sa mga tawo ug sa baruganan sa atong mga lider.
Sa pagkakaron, gipasabot niya nga ang labing mahinungdanon mao ang pagsusi kon ang atong mga hiyas isip katawhan ug ang mga lider ba nagtugma sa atong tinuod nga mga mithi.
Nunot niini, nanawagan siya og lawom nga pagpamalandong kon nagamit ba nato sa sakto ang atong kagawasan o nagpadala lang ba kita sa unsay sayon nga pamaagi sa kinabuhi.
