Gibutyag ni City College of Cagayan de Oro President Prof. Jestoni Babia ang grabe ug kritikal nga kahimtangan sa edukasyon sa nasud human sa bag-ong report sa EDCOM II nga nagpakita sa proficiency collapse sa mga estudyante sa Pilipinas.
Sumala ni Prof. Babia, ang kasamtangang educational system sa nasud wala lamang nag-atubang sa problema sa access sa edukasyon, kondili usab sa gitawag nga “severe learning poverty”, nga nagpasabot nga daghang estudyante ang dili makabasa og sakto ug dili makaabot sa gilauman nga learning level, ug sa pipila ka kaso, nagpadayon pa gani ang pag-ubos sa performance.
Miingon si Babia nga insakto ang findings sa EDCOM II, kay ang problema system-wide na ug nagpasabot nga nagpaeskwela ra ang nasud og mga bata apan napakyas sa paghatag og hustong pagkat-on.
Gipunting ni Babia ang daghang kakulangon nga nakaapekto sa performance sa mga bata, lakip ang inconsistencies sa policy implementation, inequality tali sa mga tunghaan, kakulang sa daycare centers sa ubang lugar, ug ang kakulang sa unified nutrition ug early learning governance.
Para ni Babia, kon tinuod nga gusto sa gobyerno nga mapalig-on ang pagkat-on sa mga batang Pilipino, kinahanglan hatagan sila og lig-on nga pundasyon sa sayong edukasyon, pinaagi sa pagtul-id sa mga kakulian sa policy implementation, mas lig-on nga accountability sa matag LGU, ug ang pagprofessionalize sa Early Childhood Care and Development (ECCD) workers sa mga tunghaan. (James Oliver)
