Hugot nga gibantayan sa kagamhanan ang kahimtang sa mga Overseas Filipino Workers sa nagkalain-laing nasud aron masiguro nga mapanalipdan ang ilang katungod.
Sumala sa Department of Migrant Workers, obligado ang mga employer sa ubang nasud nga sundon ang mga nag-unang katungod sa mga OFW, lakip niini ang human rights, labor rights, ug contractual rights.
Matud ni Department of Migrant Workers Undersecretary Bernard Olalia, mao kini ang mga nag-unang katungod sa mga OFW nga angay mapanalipdan ug mahinungdanon kaayo ang kontrata sa mga OFW tungod kay mao kini ang pinakabasihan nga gikinahanglang sundon sa employer ug sa empleyado.
Nagpasidaan usab ang DMW ngadto sa mga abusadong employer nga dunay tukmang aksyon sa bisan kinsang molapas sa palisiya sa nasud sa mga OFW, diin mamahimo silang malakip sa blacklist ug dili na makarecuit pag-usab.
Dugtong niini, mipahayag si Olalia nga duna silay OFW monitoring system nga bukas 24/7 kung diin mamahimong magsumbong ang mga OFW. (raniel mahunyag)
