CAGAYAN DE ORO CITY – Mag-atubang sa kasong pagpatay ang usa ka mangdugnasay sa lubi kay gitudlong suspek sa ngilngig nga pagtigbas sa iyang higala sa Purok 9,Brgy Looc,Villanueva,Misamis Oriental.
Giila ni Villanueva Police Station deputy commander Lt Ronnie Donasco ang biktima nga si Allan Dayle 48 anyos samtang ang suspek gitumbok nga si alyas Bado nga managsama nga nagpuyo sa maong lungsod.
Sumala ni Donasco nga nagbaton sila sa tulo ka persons of interest sa kremin apan usa lang niini ang natumbok ug ngadto-ngadto miangkon nga daw siya ang mihimo sa kremin.
Sa pikas bahin, gisaysay ni Bado nga wala siya’y problema ngadto sa biktima apan natripingan lamang niya kini nga patyon gamit ang sanggot nga pangdugdnas sa mga unod sa lubi.
Siya miingon nga nakagamit kini’g illegal nga drogang shabu samtang mikuyog sa panag-inom sa biktima ug uban nila nga mga higala apan wala kaayo modugay ug milaylo sa panagtapok.
Apan gumikan sa giingong epekto droga, kalit nga adunay mihasol sa iyang huna-huna ug iyang gisundan ang biktima nga nanghisi sa pansayan diin gitigbas niya sa daghang higayon.
Nangayo’g pasaylo ngadto sa kabanay sa biktima ang suspek sa iyang gihimo nga kremin.
Dugtong niini, gihikay na sa kapolisan ang mga dokumento aron kasuhan sa pagpatay ang suspek sa piskalya ning syudad.
