Posibleng makaapekto sa dagan sa impeachment case ni Vice President Sara Duterte ang giingong kakulang sa aksyon sa iyang kampo, base sa analisa ni Atty. Nazir Ynawat, national president sa Alliance of Advocates Federalism in the Philippines.
Sa interbyu sa Bombo Radyo, giingon ni Ynawat nga wala niya makita ang aktibong lihok sama sa pag-organisar og dagkong rally o mass demonstration aron makapressure sa mga magbabalaod.
Para kaniya, posible kining makaapekto sa kaso sa Bise Presidente.Matod pa niya, ang kakulang sa padayon nga pressure sa mga kongresista mahimong maka-impluwensya sa pamaagi sa paghimo og desisyon nga may kalabotan sa kaso.
Gipunto usab sa abogado nga bisan pa sa taas nga suporta sa publiko base sa mga survey, dili gihapon kini igo kung walay klaro ug konkreto nga aksyon gikan sa kampo ni Duterte.
