Ang pagpalig-on sa pamilya ug pagtinabangay sa komunidad maoy giila nga pangunang yawe aron mapabilin ang kaluwasan ug mental health sa mga estudyante sa nasud.
Mipasidaan si Department of Education o DepEd Cagayan de Oro Program Head Romeo Aclo nga nagpabilin gihapon ang dako nga kakulangon sa mga guidance counselor sa mga tunghaan taliwala sa nagpadayon nga mga hulga sa seguridad sa kabatan-onan.
Gumikan niini, gipamugos sa opisyal nga kinahanglang molihok usab ang mga barangay ug ang mga ginikanan pinaagi sa saktong paggiya sa balay lakip na ang paglimite sa mga violent nga dula ug balita.
Gipasabot sa buhatan nga dili lamang ang DepEd o ang kapulisan ang makasulbad sa maong krisis kon dili ang tibuok katilingban lakip na ang media aron maprotektahan ang kaugmaon sa mga kabatan-onan.
