Mibutyag sa mga dakong buslot ug kakulangon ang bag-ong gipahigayon nga National Simultaneous School Safety Drill sa mga tunghaan sa Region-10 taliwala sa nagpadayon nga hulga sa pang-atake o pagpamusil sa mga tunghaan sa nasud.
Mipagawas og pasidaan si Department of Education o DepEd Cagayan de Oro Program Head Romeo Aclo nga nakita sa maong drill ang mga pultahan nga walay lig-on nga trangka ug ang kakulang sa opisyal nga pamaagi sa pagpaalerto sa mga estudyante ug magtutudlo.
Dugang pa ni Aclo, gikinahanglan usab ang saktong pagbansay sa mga magtutudlo ug pag-atiman sa emosyonal ug huna-huna sa mga bata aron dili sila magul-an ug mahadlok panahon sa emergency sa tunghaan.
Gipasabot usab sa opisyal nga lisod ang pagpanalipod sa mga estudyante tungod sa kakulang sa mga security guard ug kural sa pipila ka eskwelahan, hinungdan nga kinahanglan gayud ang pagtinabangay sa tibuok katilingban.
