CAGAYAN DE ORO CITY-Nabiyaan nga kandila sa ikaduhang andana sa panimalay ang gidudahan nga tinubdan sa sunog sa Zone 6 Tin-ao, Brgy Agusan ning syudad kaganihang buntag.
Mokabat sa 150-mil ang damyos human maugdaw ang tulo ka balay sa maong lugar.
Matud sa Fire Investigator nga si SFO2 Gilbert Mordeno nga milungtad sa 15 minutos ang ilang pagpalong sa kalayo diin nagsugod ang sunog sa panimalay ni Agustin Amboy nga gipuy-an na sa iyang apo nga si Julius Hoy.
Giimbestigaran pa sa mga bombero ang hinungdan sa sunog.
Apan blangko si Hoy sa hinungdan kon nganong naugdaw ang balay nga ilang gipuy-an nga gipanag-iyahan sa iyang apohan.
Matud ni Hoy nga nakadawat siya’g tawag nga nasunog na ang ilang balay samtang nag-duty sa trabaho.
Apan gibutyag niini nga nagsugod sa ikaduhang andana sa ilang balay nga adunay tulo ka kwarto ang pag-ulbo sa kalayo.
Hisayran nga paspas ang pagkaylap sa kalayo sa maong lugar tungod kay gama lamang kini sa light materials.
