CAGAYAN DE ORO CITY-Dili angay ika-alarma ang sunod-sunod nga kamatayon sa siyam ka suspected pushers nga gipaubos sa anti-illegal drugs operations ning syudad.
Kini ang pag-depensa ni City Police Director Sr/Supt Nelson Aganon nunot sa kamatayon sa ulahing suspected pusher kay misukol sa kapolisan diha sa Brgy Macasandig sa dakbayan sa miaging gabii.
Miingon si Aganon nga mas daghan ang nadakpan nga mga buhi nga suspected pushers itandi sa mga giingong nanukol.
Gipamugos ni Macasandig Police Station commander Sr/Insp Mario Mantala Jr nga namusil ang suspek nga si Fernando Abejuela alyas Dominador Baptismo Camanian hinungdan sa kamatayon.
Samtang mangunay si City Mayor Oscar Moreno nga mahatag aksyon batok sa mga abusado nga mga pulis samtang gipatuman ang war on drugs batok sa mga tigpayuhot droga sa syudad.
Kini human gibarugan ni Moreno nga dili niya ikatugot nga mahitabo ang extra judicial killings o summary killings mismo dinhi sa dakbayan.
Miingon si Moreno nga andam siya maminaw kon ugaling dunay moduso’g reklamo batok sa mga masapon kon ugaling dunay pag-abusar ang mga otoridad.
Giklaro ni Moreno nga giuyuan usab niya nga panalipdan sa kapolisan ang ilang kaugalingon kon ugaling namiligro kini samtang gihimo ang operasyon batok illegal drug pushers.
