CAGAYAN DE ORO CITY – Mohimo sa pag-apelar ang kampo Camiguin Lone District Representative candidate Paul Rodriguez sa gidangatan sa iyang kandidatura sa May 12 elections.
Kini human nahukman sa Commission on Elections 2nd Division nga e-diskuwalipikar ang kandidatura niini tungod sa giingong dili tinood nga impormasyon nga nalatid sa iyang pagkatawo nga gidason sa ahensiya sa isla.
Nalatid sa maong hukom nga dili tinood nga sobra 11 ka tuig na nga nagpuyo ug nanginabuhi sa Camiguin si Rodriguez apan kanunay kini nakabase sa Sugbo diin nakabase ang iyang mga negosyo.
Tungod niini,siya gipahamtangan sa diskuwalipikasyon sa iyang kandidatura aron mobangga kang incumbent Camiguin Lone District Cong. Jesus Jurdin ‘JJ’ Romualdo sa Mayo nga piliay.
Dugtong niini,mohimo usab sa lakang ang panig sa negosyanteng si Rodriguez aron tinguhaon mabali ang hukom sa Comelec ug makadagan kini sa piliay sa isla.
Hisayrang maka-apelar pa si Rodriguez sa dibisyon ug kung ibasura,hayan molahos na kini sa Korte Suprema.
