Gikasubo sa kanhi Defense Secretary nga si Norberto Gonzales ang iyang naobserbahan nga pinakahalapad nga korapsyon sa kasaysayan sa nasud ubos sa administrasyon ni President Ferdinand Marcos Jr.
Sumala kang Gonzales, sa iyang interbyu sa Bombo Radyo, kini ang unang higayon sa iyang kapin sa napulo ka tuig nga serbisyo sa gobyerno nga iyang nasaksihan nga adunay mga tawo nga kayang mangawat og bilyon-bilyong pesos.
Gihulagway ni Gonzales ang kadako sa nabulsa nga kwarta sa mga kawatan isip usa ka “conspiracy” o planadong operasyon, nga nagpasabot nga dili kini binug-os nga aksyon sa usa ka tawo kundili gipangulohan ug gisuportahan sa daghang nalambigit.
Gikondena usab niya ang pipila ka mga opisyal ug lider sa nasud nga gibotar sa katawhan alang sa kausaban, apan mas giuna pa ang personal nga interes kaysa tinuod nga pagserbisyo sa katawhan nga maoy mitugyan kanila sa mga posisyon sa gobyerno.
