CAGAYAN DE ORO CITY-Gihimakak ni Ernesto Molina kinsa kanhi kagawad nga gisugo siya ni City Mayor Oscar Moreno pagsang-at ug kaso sa Ombudsman batok kang Misamis Oriental Governor Bambi Emano ug former City Councilor President Elipe.
Kini human gipasaka ni Molina ang kasong kurapsyon ug nepotismo batok Emano ug Elipe.
Nagsumikad ang kaso ni Molina sa katudluan ni Emano kang Elipe kinsa nagsilbing general manager sa Misamis Oriental Intergrated Sports Council o MOISC sa Pelaez Sports Center ning syudad.
Namugos si Molina nga dili angay itudlo ni Emano si Elipe kinsa iyang brother-in-law kay gi-konbikto na kini sa Ombudsman tungod sa kasong serious dishonesty ug falsification of public documents sa city council kaniadto.
Samtang bahad sa kampo nila ni City Mayor Oscar Moreno si Governor Emano hinungdan nga gigamit niini si Ernesto Molina pagsang-at ug kaso sa Ombudsman.
Kini ang depensa ni kanhi City Councilor President Elipe dihang gikasuhan ni Molina kauban si Emano sa kurapsyon ug nepotismo sa Ombudsman.
Miingon si Elipe nga pribadong pasilidad ang Don Gregorio Pelaez Sports Center nga gidumala sa Misamis Oriental Intergrated Sports Council hinungdan nga dili ma-apply ang Ombudsman dismissal order batok kaniya.
Namugos si Elipe nga kon angay dunay pahamtanga’g dismissal order ug wad-on sa puwesto kini walay lain kon dili si Moreno.
