Miapelar si former Barangay Cugman Kagawad Elmer Cotiamco, nga nailhan usab nga Duterte Die Hard Supporter (DDS), sa mga kongresista sa dakbayan sa Cagayan de Oro nga magpahigayon og public consultation una pa sa plenary voting sa impeachment complaint batok ni Vice President Sara Duterte.
Gitataw ni Cotiamco nga angay unta nga maminaw ang mga lider sa tinuod nga pagbati sa ilang mga constituents may kalabotan sa maong isyu.
Base sa iyang personal nga pagtan‑aw ug pakig‑estorya sa katawhan, dako ang porsyento sa mga residente nga wala mouyon sa impeachment complaint batok sa bise presidente.
Busa, iyang gihangyo ang mga kongresista nga timbangon pag‑ayo ang desisyon, ilabi na kay sensitibo ug adunay dakong epekto ang maong proseso sa nasodnong politika.
Dugang pa niya, mas maayong mahibal‑an una sa mga opisyales ang tinuod nga baruganan sa katawhan pinaagi sa konsultasyon sa publiko.
Naglaom si Cotiamco nga dili suportahan sa ilang mga representante ang impeachment complaint atol sa umaabot nga plenary voting sa Kongreso.
