CAGAYAN DE ORO CITY – Nadakpan pinaagi sa hot pursuit operation ang kanhi seaman nga aksidente nga namusil sa Barangay Kagawad ug mag-uuma sa Purok 3, Brgy Segatic Daku, Clarin, Misamis Occidental, kagahapon.
Giila ni Misamis Occidental Police Provincial Police Director Danildo Tumanda ang mga biktima nga sila Julio Vertudez alyas “Tata”, 55 anyos ug sa ka mag-uuma, ug si Arenaldo Polinar, 44 anyos, minyo ug Brgy. Kagawad sa maong lugar.
Base sa report, samtang nag-inom ang duruha sa gawas sa balay ni Polinar, naghaguros nga milabay ang usa ka Mitsubishi Mirage, kolor abo, nga dunay plaka nga AAP 3467.
Kalit nga namusil ang suspek ug naigo si Vertudez sa iyang tiyan ug milusot ang bala sa iyang paa.
Paspas nga nakaresponde ang mga kapulisan ug ilang nasikop ang suspek nga naila nga si Ric Michael Moreno, 27 anyos u residente sa Purok 6, Brgy. Poblacion 1, sa maong lalawigan.
Nakuha sa posisyon sa suspke ang kalibre 45 nga armas nga dunay tolo ka bala, ug laing duha ka basyo sa bala nga narekober sulod sa iyang sakyanan.
Temporaryong gipaslak sa Clarin MPs ang suspek.
Base sa inisyal na imbestigasyon, hubog ang suspek ug nagpataka sa pagkasa sa armas ug aksidente nga miigo sa direksyon kundiin nag-inom mga biktima.
Kasamtangang nagpa-alim sa MHARS Medical Center, Maningcol, Ozamiz City ang napusilan nga biktima.
