CAGAYAN DE ORO CITY-Gitawag nga hinangal ni kanhi Senate Pres Aquilino ‘Nene’ Pimentel Jr ang gilusad nga revolutioanary govt assembly sa nagkadaiyang bahin sa nasud ning adlawa.
Kini bisan namugos ang mga political supporter ni Pres Rodrigo Duterte nga maayo ang tuyo nila sa maong kalihukan.
Miingon si Pimentel nga mahimong maayo ang tinguha ni Duterte apan wala nagpasabot nga yatakan na lamang ang batakang balaod.
Una nang namugos si Dept of Energy Undersecretary Ben Ranque nga gusto lamang nila mapadali ang pagpatuman sa pederalismong gobierno aron dili na mapihig ang katawhan sa Mindanao.
Samtang, gihagit ni kanhi Senate Pres ang liderato sa CPP-NPA-NDF nga dili magtinunto sa ilang pakig-negosyar sa peacetalks sa gobierno.
Kini kon gusto nila nga tinud-anay nga makab-ot ang kahusay’g kalinaw nga gikinanhanglan pag-ayo sa nasud.
Miingon si Pimentel nga natural nga masuko ang gobierno kon anaa sa negosasyon apan nangatake ang mga rebelde ngadto sa mga sundalo ug kapolisan.
Nagtoo pa gyud gihapon si Pimentel nga ang peacetalks ang labing epektibo nga paagi aron masulbad ang suliran sa kahusay’g kalinaw sa tibuok nasud.
