From glitz and glam to public service, mipadayag si PLT Jeza Christyl Relevo, ang kanhing Miss Cagayan de Oro ug karon usa na ka Police Lieutenant, nga siya ug iyang klase sa Philippine National Police Academy (PNPA) Class of 2026 naggraduwar niadtong Marso 27.
Misalmot usab sila sa donning of ranks ug oathtaking sa Camp Crame niadtong Abril 14, nga opisyal nga nagtimaan sa pagsugod sa ilang karera sa serbisyo publiko.
Matod pa ni PLT Relevo, sa pagkakaron anaa pa sila sa Camp Crame ug naghulat sa ilang deployment nga pagahukman sa Directorate for Personnel and Records Management (DPRM).
Human sa usa ka bulan, i-assign na sila sa lain-laing rehiyon sa tibuok nasod.
Gipaambit usab ni Relevo nga dako ang iyang inspirasyon gikan sa iyang pamilya nga anaa sa serbisyo publiko.
Gikan sa kalibutan sa beauty pageant ug academic training, mitubo ang iyang tinguha sa pagsulod sa police service ug pagserbisyo sa katawhan.
Tambag niya sa mga kabatanunan nga dili mawad-an sa paglaum sa ilang mga damgo.
Bisan pa sa daghang rejections nga iyang nasinati, nagpadayon siya hangtod nga nakab-ot ang iyang damgo.
