CAGAYAN DE ORO CITY, Philippines – Mipasalig si Presidente Ferdinand Marcos nga makapauli na sa tagsa-tagsa ka puy-anan ang mga biktima sa pag-alburuto sa Bulkang Kanlaon sa Negros Island.
Apan, sa pagbisita ni Marcos sa probinsya, iyang gipasabot sa mga namakwit nga wala pay seguradong abiso gikan sa Philippine Volcanology and Siesmology (PhiVolcs) kung kanus-a sila ipabalik sa pagtikad sa ilang luna nga nahimutang sa tiilan sa bulkan.
Sa kasamtangan, giisa pa gihapon sa ahensya ang Alert Level 3 gikan sa 6km radius danger zone. Unang nag-alburuto ang bulkan niadtong Hunyo 2024 ug mibusikad sa pagkadisyembre.
Ayudang pagkaon, tabang pinansiyal ug trabaho ang gihatud sa presidente sa pagbisita sa usa temporary shelter area sa Negros.
Subay sa ulahing data sa Disaster Risk Reduction Office ug DSWD, misaka pa sa 9,942 pamilya ug 39,258 ka mga indibidwal sa Western ug Central Visayas ang apektado sa Kanlaon Eruption.
