CAGAYAN DE ORO CITY – Milungtad sa upat hangtud lima ka bulan ayha nahuman nila ni Ernie John Clores ug Glenn Bawa ang awit nga “Sabi ko Naman Sayo” nga kabahin sa nasulod sa top 12 sa 3rd National Bombo Music Festival.
Gibutyag ni Glenn Bawa nga taga Brgy Sto. Angel, San Pablo City, Laguna nga ang iyang asawa maoy inspirasyon sa pag-compose sa maong awit.
Dugang ni Bawa nga usa kini ka balak o tula nga iyang gihimo alang sa iyang asawa aron basahon sa kasal atubangan sa ilang mga kaparyentihan.
Apan wala niya mabasa hinungdan nga iyang gihatag sa asawa niini ug subling naukayan makalabay ang 11 ka tuig.
Dugang ni Bawa nga dihang iyang naukayan ang maong tula, ilang nasabutan ni Clores nga himoon kining awit.
Samtang personal experience usab sa songwriter nga si Niño Dela Paz Mas nga taga Burgos St., Pamplona Uno Las Piñas City ang iyang inspirasyon dihang namugna ang awit nga “Babalik-Balikan”.
Miingon si Dela Paz nga maoy unod sa iyang gi-compose nga awit ang iyang pagbati sa usa ka binuhat diin gusto niyang kanunay’ng gabalik-balikan taliwala nga wala sila mag-ila ug wala sila’y relasyon.
Dugang niini nga wala siya magdahom nga makasulod sa finals ilabina nga maoy tumong sa iyang pag-apil sa 3rd National Bombo Music Festival.
