CAGAYAN DE ORO CITY – Nadakpan kay gisilbihan sa mando de aresto ang detinado nang daan nga lider sa kontrobersyal nga Kabus Padatoon Community Ministry International Incorporated o KAPA nga kasamtanang detinado sa city jail sa Brgy Lumbia ning syudad.
Kini human isilbi sa tracker team sa Sugbongcogon Police Station ubos sa Misamis Oriental Police Provincial Office ang arrest warrant batok sa wala na ngangli nga KAPA leader.
Unod sa maong court order ang kasong syndicated estafa nga walay gihanyag nga piyansa ngadto sa sinumbong.
Dugtong niini,gibutyag ni Police Regional Office 10 Director Brig Gen Jaysen De Guzman nga bisan detinado nang daan ang akusado apan gipatuman gihapon sa kapolisan ang ilang tahas nga pagsilbi sa kasuguan sa korte.
Dumduman nga bugtong ilado nga nasulod sa Lumbia City Jail nga konektado sa KAPA mismo ang ilang founder nga si Joel Apolinario tungod sa mga kaso nga nakaduso sa usa sa mga korte sa dakbayan sa miaging kautigan.
Hisayrang wala undangi sa Bombo Radyo Phililippines-Mindanao ang pagbulabog sa ilegal nga kalihukan sa KAPA hangtod nga hingpit miaksyon si kanhi Pres Rodrigo Duterte nga kini ipabungkag.
