CAGAYAN DE ORO CITY – Napatay sa joint PNP-PCG operations ang duha ka sakop sa private army ni Kabus Padatoon founder Joel Apolinario sa Hamdayaman,Lingig,Surigao del Sur.
Kini human misukol ang duha sa mga sakop ni Apolinario samtang gisilbi ang search warrant sa korte tungod sa ilang pagbaton sa tag-as nga kalibre sa mga armas.
Miingon si Surigao del Sur Police Provincial Police Office spokesperson Maj Rennel Serrano nga gilayong gisikop usab si Apolinario ug ang laing walo ka kauban niini pinasikad sa warrant of arrest sa kasong syndicate estafa ubos kang RTC Branch 21 Judge Gil Bollozos ning syudad.
Si Apolinario ang gitumbok ni Pres Rodrigo Duterte nga nangilad sa daghang tawo hinungdan nga gimanduan ang NBI ug CIDG nga pagsikop kaniya.
Samtang gikalipay sa Securities and Exchange Commission on SEC nga nadakpan sa hiniusang operasyon sa kapolisan ug Philippine Coast Guard si KAPA founder Joel Apolinario samtang nagtagu-tago sa Hamdayaman,Lingig,Surigao del Sur.
Kini human gisilbi sa kapolisan ang warrant of arrest nga gilugwa ni RTC Branch 21 Judge Gil Bollozos sa kasong syndicate estafa batok sa grupo ni Apolinario.
Miingon si SEC -10 regional director Atty Reynato Egypto nga unta sinugdanan na kini sa pagkab-ot sa hustisya alang sa mga nabiktima sa KAPA.
Una niini,usa ka miembro ni Apolinario ang nagpatabang sa NBI-10 aron maduso ang kaso sa piskalya tungod sa
pakyas mauli ang iyang gibubo nga pahunan sa miaging tuig.
Subli giaghat ni Egypto ang mga miembro sa KAPA nga kasuhan usab nila si Joel Apolinario sa korte.
Kini aron mapalig-on pa ang unang mga kaso nga giatubang ni Apolinario nunot sa investment sca nga gisudlan sa iyang grupo.
Miingon si Egypto nga dili na angay maglaum ang mga miembro sa KAPA tungod kay mismo na ang balaod ang miila niini nga dakong pagpangilad.
Si Apolinario ang hayan e-ditinar sa city jail kay nagsumikad ang reklamo batok kaniya dinhi sa syudad.
