CAGAYAN DE ORO CITY – Dungan nga gironda sa mga sakop sa National Bureau of Investigation o NBI-10 ug Securities of Exchange and Commission o SEC-10 ang duha ka buhatan sa kontrobersyal nga grupong Kabus Padatoon o KAPA Ministry International Incorporated sa Misamis Oriental ug Bukidnon.
Base kini sa search warrant nga giisyu sa korte batok sa KAPA tungod sa illegal investment scheme niini.
Matud ni NBI regional director Atty. Patricio Bernales nga ilang gisilbi ang search warrant sa opisina sa KAPA sa Youngsville Subdivision, Brgy Igpit,Opol ning lalawigan ug sa buhatan niini sa Brgy Poblacion, Valencia City,Bukidnon.
Si Bernales miingon nga walay bisan usa nga opisyal sa KAPA ang ilang naabtan gawas lamang sa mga gwardiya niini.
Apan ilang nakompiskar ang mga mahinungdanon nga dokumento sama sa computer sets, laptops, scanner, printer ingon man salapi.
Gibutyag ni Bernales nga magpadayon ang ilang imbestigasyon sa KAPA samtang giandam ang pagpasaka’g kaso batok sa mga area manager sa KAPA nga sila si Analiza Dangcalan ug Benjamin Barretto.
Samtang gikompirmar sa SEC-10 nga dako ang posibilidad nga mag-atubang sa kaso ang mga nagpa-miembro sa KAPA.
Gibutyag ni SEC-10 regional director Atty Reynato Egypto nga maoy atubangon nga kaso sa mga miembro sa KAPA ang paglapas sa Republic Act No. 8799 o Securities Regulation Code ug posible usab nga makasuhan sila sa syndicated estafa.
Subling gitin-aw sa opisyal nga wala sila magkulang sa pagpahimangno sa publiko kalabot na sa pagpangilad nga gihimo sa maong grupo ug dili kini angayang suportahan sa publiko.
Hisayran nga nagpaggawas na’g kamanduan ang Court of Appeals nga e-freeze ang mga bank accounts ug uban pang assets nga konektado sa Kapa.
