CAGAYAN DE ORO CITY – Midangop na sa National Bureau of Investigation o NBI-10 ang pipila ka nagsilbing mga biktima sa pagpangilad sa grupong Kabus Padatoon o KAPA Community Ministry International Incorporated nga nakabase dinhi sa rehiyon.
Kini human unang gimando ni Pres Rodrigo Duterte nga bungkagon ang KAPA gumikan sa ilegal nga kalihukan niini ngadto sa ilang mga miembro.
Gibutyag ni NBI regional director Atty Patricio Bernales nga wala pa kini labot sa mga personalidad nga giimbestigaran nila gikan sa 6-mil ka dokumento nga ilang nabawi sa KAPA office sa Opol,Misamis Oriental sa miaging bulan.
Dugtong niini,giawhag ni Bernales ang KAPA victims nga dili magmakuli pagdangop sa Bombo Radyo o sa NBI-10 aron matabangan sa paghan-ay sa kaso nga dugang ipasaka batok sa grupo ni Joel Apolinario.
