CAGAYAN DE ORO CITY – Nabutang sa dakong kuwestiyon ang kapasidad sa Cagayan de Oro City Police Office o COCPO kon kaya pa ba niini mohatag sa proteksyon sa katawhan batok sa kreminalidad dinhi sa syudad.
Kini ang unod sa special report ni Konsehala Yvy Emano sa plenaryo sa konseho sa ilang sesyon diin nag-sentro sa nahitabong dakong tulis sa usa ka pawnshop sa J.R Borja Street,Brgy 29 sa dakbayan.
Miingon ang batan-ong konsehal nga ang maong pagsulod sa grupo sa mga tulisan ug pagkatulis sa patigayon ang klaro nga indikasyon nga mipalpak ang intelligence community sa paghatag seguridad sa syudad.
Dumduman nga armado sa mugbo ug tagas nga armas ang bana-banang napulo ka tulisan nga mitulis sa 9 milyones pesos nga balor sa klase-klaseng alahas Gold Mega Jewelry pipila ka metros lang gikan sa lokasyon sa estasyon sa kapolisan sa Cogon sa miaging semana.
Samtang giuyunan ni public committee chairman Konsehal Romeo Calizo ang pipila sa unod sa special report ni Emano kabahin sa kasamtangang kahimtang sa kahusay’g kalinaw dinhi sa dakbayan.
Miingon si Calizo nga ensakto ang suhestiyon sa batan-ong Emano nga angayang rebyuhon ni City Mayor Rolando ‘Klarex’ Uy ang kasamtangang internal security plan o ISP sa city govt aron mas mapalig-on ang kakulangon niini pag-abot sa intelligence information gathering.
Dismayado lang retired army major general nga si Calizo kay naporma ug nalusad ang 2023 Higalaay Festival nga walay nagsilbing ‘overall’ security overseer nga alang kaniya importante alang sa katawhan ug mga bisita sa kapistahan sa dakbayan.
Samtang nagsilbing numero uno nga prioridad ni Uy ang kaluwasan sa katawhan batok sa tanang klase sa kreminalidad sa dakbayan.
Kini ang gilauman nga pag-depensa sa iyang mga kaalyado sulod sa konseho kabahin sa palpak nga intelligence performance sa Cagayan de Oro City Police Office nga nag-resulta sa pagkatulis sa tindahan sa mga alahas sa Brgy 29 sa syudad.
Miingon si Konsehal Edgar Cabanlas nga walay ‘security break down’ sa kahimtang sa syudad.
Gani,nagbinugdong lang daw si Mayor Klarex nga local chief executive official sa kasaysayan nga kumpletong nakahatag sa bag-ong police patrols ug personal mga motorsiklo sa police stations sa dakbayan.
Dugtong niini,gitahasan ni Uy ang konseho nga mohimo’g adjustment o kausaban sa ordinansa o balaod-lokal kabahin sa pagbaton sa mga balay-patigayon sa kaugalingong mga sekyu ug CCTV installed cameras.
Kini sa tuyo sa makatabang sa kapolisan pagsanta sa mga matigayong dagkong kremin sa dakbayan.
Namahayag ang mayor nga dili na na niya e-renew ang business permits sa mga negosyo nga dili makasubay sa maong balaod sa syudad.
Gihimo ni Uy ang pasidaan dungan sa iyang pagsulti nga natumbok na sa kapolisan ang grupo sa mga tulisan ug na-rekober ang ‘get away vehicle’ nga gisakyan pasibat sa mga suspek sa miaging semana.
Sa pikas bahin,walay angayang ikabalaka ang publiko kon hisgutan ang pangkatibuk-ang seguridad sa Northern Mindanao ilabina dinhi sa syudad.
Kini bisan kon bag-uhay lang naigo sa dakong tulis nga hinimuan sa organisadong robbery group ang usa ka tindahan sa mga alahas diha sa bisinidad sa Cogon ning dakbayan.
Miingon si Police Regional Office 10 spokesperson Police Maj. Joann Navarro nga wala katulgi sa kadagkuan sa Camp Alagar ang pagpahugot sa seguridad ilabina abli ang dakbayan sa tanang mosulod-gawas nga mga tawo.
Apan gitahasan ni PRO 10 Director Police Brig. Gen Lawrence Coop ang kapolisan sa syudad nga angayang masulbad na sa daling panahon ang dakong tulis nga miigo sa dakbayan.
