(Update) CAGAYAN DE ORO CITY-Naghilak nga naghangyo ang kapikas ni PO3 Jerome Anthony Natividad ngadto sa rebeldeng New People’s Army o NPA nga buhian na nila kini sa dali nga panahon.
Kini human mibati’g sobrang kabalaka si Estafancia Natividad sa kahimtang sa iyang bana nga unang gidagit sa NPA sa lungsod sa Talakag,Bukidnon.
Gibutyag ni Gng Natividad nga unta hatagan siya’g ilhanan pinaagi sa ipadala nga video sa mga rebelde nga buhi pa ang iyang bana.
Una nang gibutyag sa usa ka NPA kumander nga ilang nadagit si Natividad tungod sa ilang gilusad nga road blockade sa Barangay Tikalaan,Talakag,Bukidnon sa miaging semana.
Hisayrang may duha ka sundalo na usab ug usa ka rebelde ang giingong naangol sa gilusad nga rescue operation sa 8th IB,Philippine Army ngadto kang Natividad sa dihang miulbo ang engkuwentro sa lungsod sa Impasug-ong,Bukidnon.
