CAGAYAN DE ORO CITY – Gikompirmar ni kanhi Iligan City Mayor Franklin Quijano ang kamatayon sa iyang kapikas nga unang na missing nga si Salma Theresa Bersales Gerona-Quijano sa Iligan City.
Kini human nailhan niini ang posteso sa iyang kapikas nga makita sa maong babaye nga unang nakit-an nga naglutaw sa Mandulong River niadtong Hunyo 29 ning tuiga.
Giangkon ni Quijano kinsa administrador sa Phividec nga sa unang tan-aw nila sa patay’ng lawas ni Salma Theresa,dili sila kumbinsido nga iya kining kapikas hinungdan nahukman gipalubong.
Apan nahukman usab nila nga ipakalot ug nadiskobre nga ang posteso sa maong patay’ng lawas ang haom sa dental record sa iyang kapikas nga nawala.
Kini ang hinungdan nga kasamtangang gihaya nila ang patay’ng lawas sa biktima samtang gihulat ang kumpirmasyon sa DNA test gikan sa kauluhan.
Dumduman nga mismo si Quijano ang mihimo’g panawagan sa Bombo Radyo niadtong wala na kauli ang biktima sa ilang pinuy-anan niadtong Hunyo 27 ning tuiga.
