CAGAYAN DE ORO CITY – Namugos si kanhi Iligan City Mayor ug karon Phividec administrator Atty Franklin Quijano nga walay foul play sa kamatayon sa iyang kapikas nga unang -missing niadtong Hunyo 27.
Gikumpirmar ni Quijano nga positibo ang resulta sa DNA test nga nagpamatood nga iyang asawa nga si Salma Theresa Quijano ang patay’ng lawas nga nakit-ang nag-lutaw lutaw sa suba likod sa ilang panimalay niadtong Hunyo 29.
Siya miingon nga dako iyang pagtoo nga nadigyas ang iyang asawa sa suba samtang nagbaklay-baklay hinungdan sa iyang kamatayon.
Giangkon usab ni Quijano nga nakasinati sa menopausal stage of anxiety ang iyang kapikas ug daghan kini’g gitumar nga tambal.
Una nang nag-match ang dental record ni Salma sa patay’ng lawas nga ilang nakita apan gusto nilang makasegurado hinungdan nga gipaubos kini sa DNA testing.
Ihatod sa iyang katapusang pahulayan si Ginang Quijano sa Agusto 8 adlaw nga Huwebes sa Iligan City.
