Kapin gatos ka mga batan-ong atleta gikan sa Cagayan de Oro City ang moapil sa umaabot nga Palarong Pambansa isip kabahin sa delegasyon sa DepEd Region 10, matod ni Rommel Aclo, program head sa DepEd Region 10.
Namahayag si Aclo sa Bombo Radyo nga bisan wala makuha sa dakbayan ang overall championship sa miaguing tuig, nagatoo siyang kusog gihapon ang ilang performance ilabina sa team events sama sa basketball, futsal ug football nga nakadugang sa ihap sa mga napili nga atleta karong tuiga.
Labaw niini, gitataw niya nga ang mga sports coordinator ug coaches sa rehiyon padayon sa pagpangandam aron mas mapalig-on ang abilidad ug disiplina sa mga kabatan-onan nga moduwa sa nasudnong kompetisyon.
Gawas niini, gilaraw na sa DepEd Region 10 nga ang pinal nga preparasyon ug pagbiyahe sa mga atleta mahitabo na karong mayo 18 aron masiguro nga kompleto ug andam ang delegasyon sa paglahutay sa Palarong Pambansa.
