Miatubang si Dra Rachel Dilla sa konseho aron ikompirmar nga gipaubos sa City Health Office (CHO) sa test sampling ang mga tubig gikan sa Cagayan de Oro Water District (COWD) ug ang mga reservior sa mga gireklamo nga kan-anan sa malls, ning syudad.
Subay sa report ni Dra Dilla, adunay duha ka barangay ang apektado, ug kini gilangkoban sa Barangay Mambuaya ug Lumbia.
Nakakuha ang CHO sa ubay-ubay nga ihap sa mga pasyente nga nagsakit sa maong dapit ug usa sa ilang gireklamo mao ang pag-inom sa tubig gikan sa gripo.
Gikuhaan usab nila sa water samples ang duha ka dakung mall, ang Gaisano ug Centrio-Ayala kay nag-ingon ang mga reklamante, gikan sila nangaon sa maong patigayon.
Sa pagkutlo ning balita, anaa sa 120 ka pasyente ang padayong nagpa-alim sa mga hospital, ug wala pay labot niini ang kapin 150 ka mga pasyente nga nagpa-admit ug outpatient na sa Northern Mindanao Medical Center.
Lakip sa maong ihap ang mga nagpatalag reklamo sa pagsuka ug kalibanga sa pipila ka barangay clinic ning syudad.
Ning adlawa, mukuha pa sa laing round sa stool ug water samples ang CHO aron ipaniguro kung luwas ba ang mga libreng tubig nga gaihatag sa duha ka nareklamo nga mall.
Kini nga mga samples ipadala sa RITM, sa kauluhan.
