Misaka pa sa 20,604 ka mga negosyante sa Cagayan de Oro ang nakalukat na sa ilang business permit sukad Enero 5 hangtud Pebrero 20 ning tuig.
Kini subay sa report sa Business Permits and Licensing Division o BPLD, ning syudad.
Gisugdan ang renewal pinaagi sa Business One-Stop Shop sa City Tourism Hall, ug matod ni Janboy Actub, spokesperson ni City Mayor Klarex Uy, unang higayon kini nga nakahatag sa taas nga extension ang syudad aron mahimong mas business-friendly ang local government.
Naglaum karon ang lokal nga kagamhanan nga mosaka pa ang ihap sa magparehistro sanglit gilugwayan ang business permit renewal hangtud Marso 31 ning tuig.
Base sa datos sa BPLD, nag-una sa Top 5 industry classification ang wholesale and retail trade nga adunay 9,947 ka rehistrado, gisundan sa accommodation and food service nga 2,191, real estate nga 1,532, manufacturing nga 1,148 ug financial and insurance nga 1,033.
Samtang sa Top 5 barangays nga adunay pinakadaghang business registrants, nanguna ang Barangay Carmen nga may 2,534, gisundan sa Kauswagan, Bulua, Lapasan ug Barangay 24.
