Nabalaka ang grupong ILAW Shared Community Inc sa ilang nadungog nga report sa Bombo Radyo nga misaka na sa kapin 200 ka tawo ang nagpositibo sa HIV sukad Enero 2025 ning tuiga. Miingon si Jade Lumapas, volunteer sa ILAW, nga mas kinahanglan sa komunidad ang “shared-awareness” aron masabtan sa publiko ang hustong paagi sa paglikay sa makamatay nga balatian. Aron dili matakdan sa seryosong sakit, gikinahanglan nga magpa-HIV test ang mga nagduda, ilabe na, ang mga lalaki nga nakighilawas sa isig ka lalaki. Gi-awhag usab ang mga kababaihan ug kalalakihan nga adunay “multiple sex partners” nga magpahiling aron maseguro ang kahimtang sa ilang panglawas. Gawas niini, nagtuo ang grupo ni Lumapas nga daghang kabatan-onan o Gen-Z ang nagpraktis sa dili luwas nga pakighilawas, busa ilang gi-enkorahe sila sa paggamit sa proteksyon sama sa condom. Una niini, dakong hagit sa grupo ang pag-awhag sa katawhan sa HIV testing tungod sa stigma nga basin masaypan sila nga “carrier” sa bayrus.
