Nabutang sa dakung risgo ang mga trabahante sa Sanjia Steel Plant nga nakabase sa PHIVIDEC Industrial Estate, Tagoloan, Misamis Oriental.
Kini ang gibutyag ni Department of National Defense (DND) Secretary Gilberto Teodoro dihang personal nga gisusi niya ang pasilidad sa planta, karong hapon.
Giingon ni Teodoro nga adunay daghang kasupakan sa safety standards ug dili luwas nga working area, lakip na ang paggamit sa “hazardous” nga mga materyales ug kemikal nga makadaut sa panglawas sa mga trabahante.
Mao kini ang hinungdan nga gironda sa Armed Forces of the Philippines (AFP), Presidential Anti-Organized Crime Commission (PAOCC), National Bureau of Investigation (NBI), ug uban pang law enforcement agencies ang planta sa naglabay nga adlaw.
Gibutyag usab sa kalihim nga posibleng gipanag-iyahan kini ni Tony Yang, diin 69 ka mga Chinese nationals ang nadakpan tungod kay wala sila makapakita sa pertinenteng dokumento alang sa operasyon sa kompanya ug sa ilang pagpuyo sa planta.
Laraw sa mga otoridad nga ipahiling ang tanan empleyado aron masuta kung sila ba na-expose sa radiation ug uban pang toxic chemicals.
Nahibal-an nga si Yang adunay relasyon kang kanhi Duterte Administration economic adviser Michael Yang, nga nag-atubang usab sa daghang kontrobersiya.
Una nang nadakpan si Tony Yang niadtong 2024 human giingong nalambigit sa Philippine Offshore Gaming Operations (POGOs).
Gipahibalo sa DND nga dili lamang ang Sanjia Steel ang gi-imbestigaran, apan apil usab ang uban pang kompanya nga nagpasilong sa PHIVIDEC Industrial Estate.
