Kapin 4.08 milyones pesos nga balor sa gituohang shabu ang nakumpiska sa hiniusang buy-bust operation sa mga otoridad sa Zone 7, Barangay Bugo, Cagayan de Oro City ka gabii sa Hunyo 2.
Nasakpan sa operasyon ang usa ka high-value individual nga giila sa alyas nga Dan-Dan, 48 anyos, minyo, walay trabaho ug residente sa maong barangay.
Gipangulohan sa Regional Police Drug Enforcement Unit 10 Team 1 ang operasyon uban sa ubang yunit sa kapolisan ug sa koordinasyon sa Philippine Drug Enforcement Agency.
Sumala sa kapolisan, mikabat sa 600 gramos ang gibug-aton sa nakumpiskang gidudahang shabu nga adunay standard drug price nga P4.08 milyon.
Lakip usab sa narekober ang weighing scale, cellphone, pouch, eco bag, mga sudlanan sa gidudahang ilegal nga droga ug marked money nga gigamit sa operasyon.
Sa pagkakaron, anaa na sa kustodiya sa Maharlika Custodial Facility ang suspek ug nag-atubang og mga kaso sa paglapas sa Sections 5 ug 11 sa Republic Act 9165 o Comprehensive Dangerous Drugs Act of 2002.
