CAGAYAN DE ORO CITY – Dako’g tsansa nga subli masang-ata ang disqualification case batok sa kandidatura pagka-kongresista sa distrito uno ni Carmen Punong Brgy Kikang Uy sa Commission on Elections- Central Office.
Kini ang tubag sa taga- Comelec sa pangutana ni Cagayan de Oro 1st District Cong. Lordan Suan kabahin sa posibilidad nga kasuha’g balik si Kikang subay sa giingong mga nahuptan ug na-presentar nga mga ebedensiya sa unang pagdungog sa kamarabaha kagahapong adlawa.
Kini may kalabutan sa lakang sa House Committee on Suffrage and Electoral Reforms sa resolusyon ni Suan nga imbestigaran ang 44 porsiento nga pagsaka sa mga botante sa Brgy Carmen diin naghawid si Kikang.
Miingon si Suan nga tungod sa napresentar nga giingong mga ebedensiya,dili imposible nga mabuhi’g balik ang nabasura na nga kaso batok sa maong kapitan.
Una nang gisaysay sa pipila ka testigo nga giingong gipabalhin sila’g rehistro sa Carmen aron masubli ang ilang kontrata isip mga trabahante sa city hall.
Nagsulti usab ang ubang mga testigo nga gipangsaraan sila hataga’g balay, scholarship programs sa mga bata ug pagpasayon makabalhin sa rehistro gikan sa ilang brgy ngadto sa balwarte sa mga Uy.
Dumduman nga una nang namahayag ang Comelec nga gisibog una nila ang kaso batok Kikang kay kulang pa ang ilang mga ebedensiya ug mga dokumento aron makapadayon sa pagtaral sa maong isyu.
Sa pikas bahin,giyam-iran lang sa legal team ni Kikang ang gi-presentar nga mga konohay ebedensiya sa maong pagdungog.
Kini tungod kay dili man ‘in aid of legislation’ ang ilang katuyuan sa pagdungog apan pagpang-ipit sa ilang mga kliyente.
Gani, gitumbok ni Atty Al Geñoso ang usa sa mga abogado ni Kikang ang pag-presentar ni Suan sa video clip ni City Mayor Rolando Uy diin nagsulti kabahin sa milabay’ng eleksyon sa brgy ug rehistro alang sa 2025 elections.
Siya miingon nga tataw nga walay direksyon ang maong sundayag ug gusto lang mangita’g ebedensiya gamit ang pagdungog sa kamarabaha aron mohimo’g mga political propaganda.
Si Suan ang anaa sa iyang pagpapili alang sa ikaduhang termino sa distrito uno diin atbangan siya’g balik ni Kikang sa May 12 elections.
