CAGAYAN DE ORO CITY-Namugos ang Tagoloan Police Station nga dili tungod sa ‘presssure’ gikan sa ilang PNP top officials ang sunod-sunod nga anti-illegal drug operation batok sa mga tawo nga nalambigit sa gidiling droga.
Gihimo ni Tagoloan Police Station commander C/Insp Allan Oniana nunot sa kamatayon sa magsoong Jeffrey ug Jerry Jandayan nga pulos nagpuyo sa Jasaan, Misamis Oriental.
Miingon si Oniana nga tuyo pusilon ug pabutha’g granada sa magsoon ang mga pulis nga naglusad buy bust operation hinungdan nga napusilan nila kini ug diha-diha nangamatay.
Nasuta nga nalambigit sa pagpalusot sa mga armas ang magsoon diin unang nakuhaa’g 23 ka sachet sa gitoohang shabu dihang nalusad ang operasyon sa Sitio Carampil, Brgy Baluarte,Tagoloan ning lalawigan kagabii.
Samtang nakurat usab ang kanhi kapikas ni Jerry Jandayan sa gidangatan nga kamatayon niini.
Miingon si Nickel Jandayan nga wala siya’y ideya nga misulod na sa giingong ilegal nga kalihukan ang iyang kanhi kaipon.
Una nang naputol ang panag-uban sa magkaipon nga Jandayan dihang mibiya ang biktima bisan nga nagbaton na sila’g duha ka anak.
