CAGAYAN DE ORO CITY-Gipamugos sa City Drug Enforcement Unit o CDEU nga misukol sa operasyon ang napatay’ng drug suspect atol sa ilang gipahigayon nga anti-illegal drug operation sa Serenia Street, Brgy Carmen ning syudad.
Matud ni CDEU head Sr/Insp Excyllo Alcantara nga ka-upat ka higayon nga nagpabuto sa iyang .45 kalibre nga armas ang napatay nga si Rogen Cobar, 25 anyos, may kapuyo ug nagpuyo sa Brgy Igpit, Opol, Misamis Oriental.
Gitin-aw ni Alcantara nga dugay na nila nga gimonitor ang illegal nga kalihukan sa napatay’ng drug suspect.
Siya miingon nga gawas sa pagbaligya’g ilegal nga druga, nalambigit usab ang suspek sa kasong bukas-kotse, snatching ug robbery hold-up.
Gibutyag usab ni Alcantara nga gawas kang Cobar, daghan pa mga drug suspect ang ilang gimonitor ning panahona.
Hisayran nga naigo sa iyang dughan si Cobar hinungdan sa iyang kamatayon ug nakuha sa iyang posisyon ang suspected shabu, drug paraphernalia, kalibre 45 nga armas ug pipila ka fire cartridges sa crime scene.
