Gipahugtan na sa Cagayan de Oro City Police Office o COCPO ang ilang pagpahimutang sa mga kapolisan alang sa tulo ka adlaw nga Mindanao Business Conference taliwala usab sa nagpadayon nga pagpangandam sa Higalaay Festival.
Sumala pa ni COCPO Spokesperson Major Emilita Simon, dili lang sa usa ka lugar gipokus ang ilang pagpanalipod kundili sa nagkalainlaing mga venue, lakip na sa mga hotel, meeting places, ug tourist spots diin anaa ang mga VIP ug bisita.
Gumikan niini, labing gidoble sa komand ang ilang pagbantay sukad pa sa miaging mga semana aron masiguro nga malinawon ug walay bisan unsang untoward incident nga makadaut sa maong dagkong kalihokan.
Samtang bisan wala matala ang eksaktong ihap sa mga misalmot sa maong komperensya, gipasalig sa maong opisyal nga kompleto ug nakahan-ay na ang tanang security details aron matagamtaman sa tanan ang hingpit nga kasiguruhan.
