Padayon gihapon ang pursuit operations sa Police Regional Office –10 human giatake sa 200 guerrilla fighters sa New Peoples Army (NPA) ang Binuangan Police Station sa Misamis Oriental.
Matud ni PRO-10 Regional Director General Timoteo Pacleb nga upat ka mga pulis ang samaran sa maong pagpangatake nga sila si SP01 Ramonito Zambas, P03 Alberto Bernadas, P01 Joshua Satur ug PSI Dante Hallasgo ang hepe sa maong police station.
Natusak-tusak og bala ang Binuangan Municipal Police Station ingon man ang ilang duha ka mobile patrol.
Miggamit og tag-as nga kalibre sa armas ang mga rebelde kun diin na-rekober usab sa crime scene ang mga gasolina nga nabiyaan sa mga armado.
Nagtoo si Pacleb nga ang gihimong pagpangatake sa mga NPA giingong tungod sa pagkansela ni Pres Rodrigo Duterte sa peacetalk.
Samtang, gikumpirmar ni PSI Dante Hallasgo, ang hepe sa Binuangan Municipal Police Station nga maoy tuyo sa mga NPA nga kuhaon ang ilang mga armas.
Siya miingon nga maoy singgit sa mga terorista sa dihang giatake ang ilang police station mao nga ipa-surrender ang ilang mga armas.
Apan, wala magpadala si Hallasgo sa mando sa mga terorista inay nakig-bakbakan sila niini bisan paman kulang ang ilang pwersa.
Si Hallasgo miingon nga andam sila makigkamatay sa mga rebelde ug dili mahitabo nga ilang i-surrender ang ilang mga armas.
Sayran nga narekober sa Scene of the Crime Operatives kon SOCO-Misamis Oriental team sa Gingoog City ang ubay-ubay ka mga fire cartridge cases sa M16 ug AK 47 sa gawas sa Binuangan Municipal Police Station.
Matud ni SOCO-Misamis Oriental team leader PCInsp Joseph Esber nga mga tag-as nga kalibre sa armas ang giggamit sa mga teroristang NPA sa pag-atake sa maong police station.
Gani, narekober usab nila ang mga molotov bombs, tulo (3) ka M203; duha (2) ka garsole grenade; fully loaded nga magazine sa AK47; mga gasolina ug mga dokumento kun diin nakabutang ang ilang mga plano.
Gikatakda usab nga paasidunggan ni PRO Dir Gen Pacleb ang mga pulis sa Binuangan Police Station nga nakig-engkwentro sa kapin sa 200 ka mga rebeldeng
New People’s Army .
Matud ni Pacleb nga iyang hatagan og medalya sa Kagitingan ingon man cash assistance ang mga “wounded in action” personnel ilabina nga ilang gi-protehiran ang ilang istasyonan.
Dugang pa niini, magpadayon ang pursuit operation aron madakpan ang mga armado.
Una nang gitawag ni Pacleb ang mga teroristang NPA nga kriminal.
Nagpagawas usab karon og kamanduan si Binuangan Mayor Marcelo Abao ngadto na sa mga residente nga likayan una ang pag-gawas gawas sa ilang mga panimalay panahon sa kagabhion.
Kini nunot na sa gihimong pagpangatake sa mga NPA sa Binuangan Municipal Police Station.
Si Mayor Abao miingon nga dako ang damyos nga gihimo sa mga rebelde ilabina nga natusak-tusak ang dingding sa police station lakip na ang ilang duha ka mga mobile patrol.
Sa pagkakaron, gihulat pa ni Mayor Abao ang kinatibuk-ang damyos nga gibilin sa mga NPA sa pag-atake sa police station.
