Nagtuyok ug nagbantay na sa mga kadalanan, terminals, ug pantalan ang kapin usa ka libo ka composite personnel sa dakbayan sa Cagayan de Oro alang sa Oplan Undas 2026.
Gibutyag ni City Councilor Roger Abaday, Chairman sa Committee on Police, Fire, and Public Safety, nga pormal nang gipakatap ang maong pwersa gikan sa COCPO, Task Force Oro, Philippine Army, RTA, CDRRMD, CLENRO, ug mga barangay tanod kagahong adlawa.
Gipasabot sa konsehal nga gawas sa mga sementeryo, nagpahigayon usab og mobile patrol ug roving inspection sa Agora ug Westbound Terminal sa Bulua diin nagdagsa ang liboan ka mga biyahero ug pasahero.
Subay sa pagkompirma nga walay bisan unsang hulga sa terorismo sa syudad, mas gisentro sa mga otoridad ang pagpaniid batok sa hulga sa mga kawat ug gagmayng kriminalidad.
Busa, gipasalig sa buhatan nga kontrolado ug nagpabilin nga malinawon ang tibuok dakbayan.
