CAGAYAN DE ORO CITY – Alerto ang Cagayan de Oro City Police Office (CoCPO) batok na sa mga negosyante nga mamaligya’g ilimnong makahubog ilabina nga nagsugod na ang liquor ban.
Gihangyo ni CoCPO spokesperson Lt. Col. Mardi Hortillosa ang mga negosyante nga dili baligyaan sa ilimnong makahubog ang bisan kinsa nga gustong mopalit niini ilabina kung wala sila’y permiso gikan sa Department of Tourism kon DoT.
Siya miingon nga mag-atubang sa election offense ang bisan kinsa nga masapon nga mamaligya ug mopalit sa ilimnong makahubog hangtud Mayo 13, 12 midnight.
CoCPO spokesperson Lt. Col. Mardi Hortillosa
Samtang, naglaum ang Regulatory Complaint and Board (RCB) nga mahimong responsable ang mga negosyante sa ilang saad nga dili mamaligya’g ilimnong makahubog sugod karong adlawa hangtud sa Mayo 13.
Matud ni Atty Egay Uy, chairman sa RCB nga nagbutang sila’g mga poster sa mga tindahan kalabot na sa liquor ban.
Asoy pa niini nga nalipay siya tungod kay positibo ang tubag sa mga mamaligyaay ilabina nga nasayod na sila sa ilang angayang himoon panahon sa pagpatuman sa liquor ban.
