Gipalawman sa usa ka heritage consultant ang kasaysayan sa mga Chinese migrants sa Mindanao atol sa kasaulogan sa Chinese New Year kagahapong adlawa.
Sa pakigpulong ni Ryan Albert Ignacius Sanchez, iyang gipasiugda nga dili madeny sa nasud ang dakong kontribusyon sa mga Chinese migrants sa nation building sa Pilipinas.
Matod niya, dako ang papel sa komunidad sa mga insik sa pagpalambo sa ekonomiya, ilabina sa sektor sa negosyo ug komersiyo.
Sumala pa ni Sanchez, bisan wala pa miabot ang mga Kastila sa Pilipinas, aduna nay napundar nga relasyon ang nasud ug ang China pinaagi sa karaang trade links.
Dugang pa niya, aduna nay mga Chinese nga namuyo sa Pilipinas sa unang panahon ug nakapahimutang sa ilang kaugalingon isip mga negosyante nga nakaamot sa paglambo sa lokal nga komunidad.
Gipahinungdanan usab ni Sanchez nga ang maong kasaysayan usa ka pamatuod sa dugay nang ugnayan sa duha ka nasud ug sa padayong kontribusyon sa Chinese community sa paghulma sa kultura ug ekonomiya sa Pilipinas. (James Oliver)
