CAGAYAN DE ORO CITY – Gihuptan na sa syudad ang halos 400 ka kaso sa COVID-19.Kini human napun-an sa pito ka aktibong kaso sa bayrus ang syudad diin naglakip sa bag-ong local transmission.
Miingon si City Health Office head Dr Lorraine Nery nga sa bag-ong mga kaso,unom kanila ang local cases ug usa ang locally stranded individual rason nga anaa sa 397 ang katibuk-an natakbuyan.
Nakatala na usab sa 255 ka pasyente nga nangaulian apan may 130 pa sa infected patients ang pabiling gipaubos sa health monitoring sa dakbayan.
Samtang ipaubos sa local lockdown ang porsyon sa Brgy 35 ning syudad tungod sa pagka-takdi sa usa sa mga residente niini.Kini human natala ang dugang transmission sa coronavirus pinaagi sa pasyente nga naghambin sa maong sakit.
Gibutyag ni City Health Office epidemiologist Dr Joselito Retuya nga nakig-koordinar na sila sa mga opisyal sa brgy aron limitahan ang lihok sa mga residente sa lugar.
Una usab niini,giwagtang na ang focus lockdown sa porsyon sa Brgy Indahag nga nasudlan gihapon sa local transmission sa bayrus sa miaging Agosto ning tuiga.
