CAGAYAN DE ORO CITY, Philippines – Gipangandaman sa Department of Health ang posibleng pagsaka sa kaso sa Leptospirosis samtang nakasinati ang Pilipinas sa daghang pagbaha dala sa Super Typhoon karina, ug mga pag-ulan nga dala sa Monsoon Rains (Hanging Habagat).
Gumikan niini, gipalanog ni Health Secretary Ted Herbosa ang panawagan sa publiko nga likayan ang paglugsong sa tubig-baha
Gitambagan sa kalihim ang publiko nga dili mulangoy sa baha tungod kay hugaw kini nga tubig ug dili sama sa swimming pool.
Gi-awhag sa DOH ang mga ginikanan nga mahimong responsabli sa ilang mga anak panahon sa ting-ulan.
Abiso sa mga eksperto, daghang kagaw ug sakit ang makuha gikan sa hugaw nga tubig-baha ug usa niini ang leptospirosis.
Ang leptospirosis usa ka klase sa makapatay nga sakit, nga makuha gikan sa ihi sa ilaga nga misagol sa tubig-baha ug lapok.
Aron makalikay sa maong sakit, gipanawagan ni Herbosa ang publiko nga mubisita sa labing dool nga Barangay Health Center aron magparesita ug mahatagan sa prescriptive antibiotics alang sa leptospirosis sama sa Doxycycline.
Gawas sa leptos, taas gihapon ang rehistro sa mga tawong natakbuyan sa dengue, cholera, dysentery, diarrhea, amoeba, ug uban pang water-borne disease sa ting-ulan.
