CAGAYAN DE ORO CITY, Philippines – Gibasura sa Commission on Elections (Comelec) 1st Division ang disqualification case batok sa lima ka mga miyembro sa pamilyang Tulfo tungod sa kakulang sa gikinahanglang dokumento.
Gibutyag ni Comelec chairman George Erwin Garcia nga wala nalakip sa petisyoner ang kopya sa certificate of candidacy (COC) sa mga respondents, busa wala na gihisgutan ang merito sa kaso.
Gitin-aw sab sa Comelec nga mahimong subling iduso ang petisyon kung mapasa na ang kumpletong requirements.
Ang mga miyembro sa pamilyang Tulfo nga lakip sa gipahamtangan sa disqualification case mao sila si ACT-CIS Rep. Erwin Tulfo; broadcast journalist Ben Tulfo; ACT-CIS Rep. Jocelyn Pua-Tulfo; Quezon City Rep. Ralph Tulfo; ug former Tourism Secretary Wanda Tulfo Teo. Ang petisyoner nga si Atty. Virgilio Garcia nag-ingon nga ang mga Tulfo naglangkob sa usa ka political dynasty nga gi-prohibitar sa 1987 Constitution.
Miingon si Garcia nga ang petisyoner mahimong mag-file sa motion for reconsideration (MR) sa kaso, ug hulatan ang desisyon sa resulta sa MR gikan sa Comelec en banc.
