Mikunhod ang kaso sa pagpangabuso sa mga kababaihan sa NOrthern Mindanao sa nagbalay nga usa ka tuig.
Kini ang gibutyag ni Police Regional Office 10 Police Regional Office-10 Director PBGen. Christopher Abrahano, atol sa press conference kagahapong adlawa.
Subay sa iyang report, ang kaso ubos sa Republic Act No. 9262 o ang Anti-Violence Against Women and Their Children Act mikunhod gikan sa 567 ka kaso niadtong 2024 ngadto sa 556 ka kaso sa tuig 2025.
Dugang niiini, mi-uswag ang crime solution efficiency gikan sa 52.20 porsyento ngadto sa 56.3 porsyento, samtang nakaangkon og 100 porsyento nga clearance efficiency.
Samtang, ang mga kaso sa pagpanglugos mikunhod pag-ayo gikan sa 620 ka insidente ngadto sa 448 ka kaso.
Bisan pa niini, gipadayag nga adunay pagbag-o sa solution efficiency nga gikan sa 50.32 porsyento ngadto sa 43 porsyento, ug clearance efficiency nga anaa sa 98.66 porsyento.
Sa laing bahin, ang mga kaso sa acts of lasciviousness mikunhod usab gikan sa 183 ngadto sa 171 ka kaso, uban sa pagtaas sa crime solution efficiency gikan sa 49.2 porsyento ngadto sa 51 porsyento, ug clearance efficiency nga miabot sa 98.8 porsyento.
Matod ni Abrahano, nagpakita kini sa padayon nga paningkamot sa kapolisan sa pagpanalipod sa kababayen-an ug pagsiguro sa ilang kaluwasan sulod sa komunidad.
Gidugang pa niya nga giila sa PNP ang kababayen-an isip mga kaabag sa pagtukod sa nasud ug magpadayon ang ilang suporta pinaagi sa gender-sensitive nga mga polisiya ug programa. (James Oliver)
