CAGAYAN DE ORO CITY – Gikompirmar ni Kag Edgard Cabanlas nga nabasura ang kasong kriminal nga gipasaka sa magtiayong Feliciano batok duha ka midwives ug health worker sa Brgy Camaman-an Health Center ning syudad.
Kini human unang giakusar sa magtiayon nga nagpasagad ang respondents sa maong kaso hinungdan sa kamatayon sa bag-ong himugso nga bata sa miaging Hunyo 2021.
Miingon si Cabanlas kinsa mihatag sa libreng legal services sa mga sinumbong nga wala makumbinser ang piskalya sa reklamo sa mga ginikanan sa biktima hinungdan nga kini ilang gibasura.
Una niini,giakusahan ni Richelle Feliciano nga namatay ang iyang anak tungod sa pagpasagad nila ni Elena Udasco;Jennifer Galarion,Remedios Domo ug Lilia Quizon apan pulos kini gipanghimakak sa mga hingtungdan.
Samtang nagdumili paghatag reaksyon ang mga kanhi sinumbong subay usab sa mando sa City Health Office.
